L-istudenti li jsegwu l-programm tal-Malti bħala lingwa barranija għażlu tema li studjaw sa issa u kitbu ftit sentenzi dwarha. Nistednukom taqrawhom.

It-tieni term infetaħ bit-tema tal-passatempi. Waħda mil-lezzjonijiet tal-kitba kienet marbuta ma’ kisba numru 7: Nikteb, waħdi jew ma' sħabi, poeżiji jew taqbiliet ta' ġeneri u forom differenti għall-gost fuq temi li jolqtuni u li jkun fihom figuri tat-taħdit u tal-ħoss sempliċi.
L-istudenti tas-Seba’ Sena kienu mħeġġa biex jippruvaw jiktbu taqbila marbuta mal-passatemp favorit tagħhom. Dan sabiex waqt li jieħdu gost jiktbu, ikomplu jipprattikaw aspetti letterarji li bdew jitgħallmu f’din is-sena skolastika, fosthom: l-istrofa, il-vers, ir-rima mbewsa (jew meta vers jaqbel eżatt ma’ ta’ taħtu), il-metafora, is-similitudni u l-anafora.

It-taqbiliet saru minn għadd ta’ studenti tal-klassijiet 7H, 7C U 7I li xtaqu jaqsmuhom mal-qarrejja filwaqt li jistiednu lill-istudenti biex jippruvaw jidentifikaw l-aspetti letterarji ta’ kull taqbila!

Fl-okkażjoni ta' Jum San Valentin ħejjejna ġabra ta' idjomi li fihom hemm imsemmija l-qalb jew l-imħabba.  Indunajna li hemm numru mhux ħażin!  Mhux ta' b'xejn li l-imħabba hija tant importanti f'ħajjitna!  Awguri għal ħafna mħabba! 

Din is-sena, minħabba ċ-ċirkustanzi li ninsabu fihom, iċ-ċelebrazzjonijiet li jsiru s-soltu f'dan iż-żmien 'mistenni minn kulħadd' ġew ikkanċellati.  Dan ma fissirx li ma sarux attivitajiet alternattivi li jibqgħu jżommu t-tradizzjoni ta' din il-festa għaddejja, anke fi żminijiet straordinarji.  Żewġ studenti mill-Klassi 7H, Maria u Mariah, kitbu artiklu dwar il-Karnival li ġie ppublikat fuq ir-rivista 'Sagħtar'.  Aħna intervistajniehom biex insiru nafu iktar dwar minn fejn nibtet din l-idea u dwar x'fih dan l-artiklu!  

Merħba lura lejn l-iskola!  Wara l-waqfa għal żmien il-Milied, issa huwa ż-żmien li nerġgħu nxammru l-kmiem biex inkomplu l-ħidma tagħna, anke fil-lingwa Maltija.  Għalhekk, għeżież studenti, komplu ibagħtu l-kitbiet tagħkom u aħna nperrċuhom hawn, fuq din is-sit apposta għalikom. Hekk kif għamlu dawn l-istudenti tal-klassi 7H!  Il-kitbiet tagħhom tistgħu tarawhom fit-taqsima 'Kitbietna' taħt 'Seba' sena'.  Bravi tassew!  Ejjew, biex flimkien inkomplu nitgħallmu u nikbru flimkien fit-tagħlim tal-lingwa Maltija! 

Merħba lura lejn sena skolastika ġdida li żgur li se tkun differenti mill-oħrajn!  

Madankollu, is-sit Kitbietna se jkompli bħas-soltu jilqa' u jwassal il-kitbiet tagħkom l-istudenti! Għalhekk, apparti li nilqgħu magħna lill-istudenti ġodda tas-seba' sena u nħajruhom biex jibagħtu l-kitbiet tagħhom, ninkoraġġixxu wkoll dawk tat-tmien sena biex kif għamlu diġà, ikomplu jitħarrġu f'din il-ħila ta' kitba u jibagħtuhom hawn biex jidhru fuq is-sit!  

Għalhekk, nilqgħukom lura lejn l-iskola biex inkomplu nitgħallmu u nikbru fil-lingwa Maltija!